Vasch o 80to berscheskero di le putripestar le logeristar Buchenwald, andi khangeri Lackenbach jek ratakero molinipe tel likerdo ulo. I Privati Pedagogischi Utschi Ischkola Burgenland taj i khangeri use ada gondolipeskero kirati akarde, kaj o jazziskero muschikaschi Harri Stojka leskere gitarakere hangijenca jek muschikano cajchn beschartscha.

Telal o anav „Romengeri sor – o khelipe le medijendar“ ando kisetinipe le aprilistar ando bundakero kancleriskero birovtschago Betschiste, i 33ti dialogoskeri seletoskeri forma tel likerdi uli. Pasche ekspertkiji taj ekspertscha, i Michaela Brunner taj i Simone Daxecker le nacijonali Romengere-kontaktoskere thanestar, te but kherodaschkiji taj kherodaschtscha schaj akarde.

O „Forum4Burgenland“ jek sikadipeskero forum la Privati Pedagogischi Utschi Ischkolatar Burgenland, la sikadipeskera direkcijonatar le Burgenlandiske taj le burgenlanditike flogoskere grupnengere bajrotschendar hi. O adaberschengero talalinipe telal o anav „Nevo tschibtschakero prikdipe“ tel likerdo ulo.

Ando 8to april o Internacijonali Romengero Di hi. Sajt 1990 pasche ada datum, upro cilo them mulatintschage tel likerde on. Fatreterkiji taj fatretertscha la flogoskera grupnatar le Romendar ada di len, i kultura taj aktujeli tematscha upre te sikal. I Roma VHS Burgenland adabersch use jek talalinipe akartscha, savo pe la situacijaha le Romendar pal 1945 dschi andi adiveseskeri cajt, donde bescharel.

Telal o anav „Maripe andi Austrija. 30 berscha Romengero atentato Erbatar.“, ando parlamento o mulatintschago uso Internacijonali Romengero Di tel likerdo ulo. Ande ada bersch o terdschijiptscha andar 1995 ando dikipe terdschonahi. Afka odole schtar Romenge gondolim ulo, save opfertscha le rechtsekstremi teroristar ule.

O Aleksandar Nikolic ojs tschavoro andi Austrija alo. Duach aun likerdo bajder sikadipe, ov jek barikani karijera kertscha. Adi, ov aktivi la butjakera integracijake le Romendar taj Romnjendar and pe bescharel. Ando keripe le projektostar Bicinipe, ov praksisakere kvalifikacijontscha ando biknipe del.

Ande amari sendungakeri rik „Naschade Romengere sidlungtscha le Burgenlandistar“, akan le gaveha Tikni Boslina amen donde bescharas. O gav jek falato la gemajndejatar Mischka hi. Buteder sar epasch le gaveskere dschenendar, agun Roma sina. O reporteri Adi Gussak upro jomakero rodipe pe kerel, te dikel, so andar odola manuscha ulo taj obste te adi meg Roma andi Tikni Boslina dschin.

Na dur pal, o bundakero ministerijum la butjake taj la virtschoftake (BMAW) phentscha, hot le Romenge taj Romnjenge taj le Sintijenge taj Sintizzenge, upro austritiko butjakero foro pomoschinen. Le keripeha „Romengeri sor le butjakere foroske“ imar but projekti kerde ule. O lek terneder adale keripestar hi o projekto „O DROM ANDI CUKUNFT“.